كسوة لأطفال بالمفرق
ايد على ايد طفل سعيد ، آوت آند أباوت
السبت 2017/2/25

السنة الماضية بلشنا مشروع كسوة في أحد المخيمات العشوائية في مدينة المفرق بقرب من مخيم الزعتري وهو مخيم غير مدعوم أبداً وبعد ما أخذنا جولة فيه ودرسنا بعض احتياجاتهم وبناءً على وضع المخيم السيء قررنا نرجعله السنة يوم السبت 2017/2/25 ونستكمل جهود المبادرة لنغير ونساعد الأطفال بأكتر من طريقة وحبينا تكون بداية لشي ممكن نكمله لقدام ونترك بصمة بحياة ناس رائعين…

أولاً:
هيكون دعم مادي عن طريق توفير شغلتين الاولى هنكمل جاكيتات لكمان جزء من الأطفال اللي ما أخدوا المرة الماضية والثانية أحذية للأطفال لحاجتهم الماسة الها وليقدروا يمشوا ويركضوا بطريقة آمنة أكتر…

ثانياً:
المرة الماضية تعرفنا على ناس رائعين من المخيم ومن مدينة المفرق اللي على الرغم من الظروف الصعبة وعدم توفر موارد عم يتطوعوا ليدرسوا الأطفال وما يتركوهم دون تعليم ليحاربوا الجهل والأمية في كرافانات بسيطة تحولت لمدرسة عم تكبر شوي شوي بجهود أهالي المفرق يجزيهم الخير فقررنا نحاول معكم نوفرلهم قرطاسية و كتب!

في أكتر من طريقة بتقدروا تساعدونا فيها:
١) التبرع بمبلغ مالي لنغطي كلفة الجاكيتات والأحذية علما انه أسعار الأحذية من 7 – 10 دنانير
والجاكيتات 15 دينار
٢) التبرع بالقرطاسية والأجندات غير المستخدمة طبعاً
٣) التبرع بكتب مدرسية قديمة لأنه المدرسة ما عندها مناهج تمشي عليها (الصفوف من أول ابتدائي حتى الخامس) والأساتذة المتطوعين طلبوا كتب لتسهل عليهم عملية التدريس

كلنا بنقدر نساهم لأنه دينار فوق دينار بيعمل كتير ودفتر جديد ومنسي على الرف عندي وعندك بالبيت ممكن يكون جزء من مستقبل طفل عم يحلم وشايف ضو بآخر هالطريق…
وبنكون كلنا باللي بنقدر عليه ساهمنا برسم فرحة عوجوه الأطفال و كمان ساعدناهم يتعلموا ليكون عندهم مستقبل مشرق و سعيد ..

أبسط الأشياء بحياتنا ممكن تعمل فرق كبير بحياة غيرنا ♥

للتبرع الرجاء الاتصال مع فريق ايد على ايد على الأرقام التالية:
0796393958
0799663096
0796986260
في حال عدم الرد على اتصالاتكم بالأرقام المدرجة من قبل أفراد الفريق لأسباب التواجد في أماكن العمل سيتم الإتصال بكم من طرفنا لاحقاً ويمكنكم التبرع في كافة فعاليات وأنشطة آوت آند أباوت

ملاحظة: سيتم تزويدكم بتفاصيل التطوع كاملة لاحقاً لحصر العدد

مبادرة ايد على ايد مستمرة بعطاءكم ومحبتكم على مدار السنة من 2010

معا بمحبة و سلام
فريق ايد على ايد
آوت آند أباوت
www.facebook.com/groups/outandaboutjo