إذا كنت بتعشق الرياضة والحماس والتحدي وبتدور ع شي جديد تفجّر فيه طاقتك بطريقة ايجابية ورياضية إذاً لا تضيّع عليك سباق مجنون رياضة!

شو هو سباق مجنون رياضة؟
هو سباق بتنظيم من TrainersGym و مسافات بلا حدود بالتعاون مع نادي بشارات الغولف في تاريخ 11/11/2016 من الساعة عشرة الصبح، وهاد السباق راح يكون غير شكل لأنه بعتمد على قدرة المتشاركين و إصرارهم على تخطّي العديد من الحواجز و العوائق قبل الوصول لخط النهاية، يعني قبل ما يوصل المتشارك للنهاية لازم يجتاز هاي الحواجز اللي اخترناها وحطيناها بعد تدقيق وتأني و بعد ما تأكّدنا أنها راح تسلّيكم و اتضحّكم وتختبر مهاراتكم الجسدية.

في مستوى لياقة محدد للمشاركة في السباق؟
لأ ، ما تقلقوا، لأنو السباق مناسب لجميع مستويات اللياقة ومفتوح لكل اللي بحبوا الرياضة و اللي حابين يشاركونا، بنوعدكم انها تكون تجربة شيّقة وممتعة!

شو هي فئات المتشاركين؟
راح يكون في فئتين للمتسابقين: فئة للشباب وفئة للصبايا

شو الفئات العمرية المسموح تشارك؟
أي حدا بحب الرياضة والحماس، شب أو بنت وعمره 14 فما فوق

شو هي طريقة التسجيل وكم سعر التذكرة؟

التسجيل حصري في Trainers Gym وإذا ما بتعرفوا المكان، احنا في شارع شهداء الحرام الإبراهيمي، بموازاة شارع عبدالله غوشة مجمع غاردن سيتي1 #38 B1 ورقم تلفونّا
065820078 ، وسعر التذكرة 10 دنانير.

في فعاليات تانية غير السباق؟
طبعاً فيه! عند ختام الحفل في فقرات ترفيهية متنوعة وموسيقى و-DJ

في مواصلات؟

نعم، لكل الأشخاص اللي ما عندهم وسيلة مواصلات، TrainersGym راح يوفّر مواصلات ذهاباً وإياباً من Trainers الى موقع السباق و العكس، التجمّع من الساعة 8:30 صباحاً والعودة الساعة 1:00 مساءً.

شو الأشياء اللي راح يحصل عليها المتشاركين؟

بمجرد أنكم اشتريتوا التذكرة، بإمكانكم تتمرنوا مجاناً في TrainersGym خلال الفترة 1/11/2016 ولغاية يوم السباق 11/11/2016 عشان تجهزوا حالكم للسباق وترفعوا مستوى اللياقة، كل المطلوب منكم انكم تظهروا التذكرة لموظف الإستقبال في النادي، وبالنسبة ليوم السباق، أي شخص بوصل لخط النهاية في السباق راح يحصل على مدالية مشاركة.

ملاحظات:
*نصيحة تسجلوا بأقرب وقت ممكن لأنه عدد المشاركين والتذاكر راح يكون محدود
* احتمال ملابسكم تتبلل أو تتوسخ، فإذا حابين تجيبو معكم غيار، مش غلط 🙂

بنستناكم، وأهلا وسهلا 🙂

سباق مجنون رياضة