دهب مصر مع آوت آند أباوت 
Coral Surfing Egypt with Out&About
مفاجئه نهايه ٢٠١٦ مع آوت آند أباوت رحلة الى دهب.. عيشو معنا المغامره

بِمَا إنّو صارلنا 6 سنين مع بعض عشنا الحلو و المر وأكلنا وشمينا الهوا مع بعض واحتفلنا كتير سوا.. قررنا حفله راس السنه السادسة النا تكون غير و بغير مكان من الي احنا متعودين عليه.. حتى بطبيعة غير، بطابع بيئي بدوي بعيد عن أي نوع من التكنولوجيا الي ماخده كل وقتنا. رح نقعد 4 أيام معزولين عن العالم الي احنا حطينا حالنا فيه، 4 أيام رح نقضيهم مع بعض بدون تلفونات و نت و أشياء بتبعدني عن الشخص الي قاعد جنبي، رح نعيش جو خرافي، نقضيها مع البحر والصحراء وبين الخضار. طبيعة جميلة ببساطتها… وفي طيران تحت المي
coral surfing كمان
يومنا الاول من عمان الى العقبه.. رح نتحرك وجه الصبح، بنوصل العقبه بنفطر مع بعض في مطعم هاشم العقبه، بعد الفطور بنتحرك ع المينا عشان نركب المركب الي منه رح تبلش المغامره تاعتنا، بنوصل مينا طابا بكون في الباص بستنا فينا عشان نتحرك ع دهب بنوصل ع منطقه البانوراما في دهب بنتغدا و بنريح شوي بعديها ع البحر مره تانيه بنركب القوارب عشان نطلع ع جزيره ابو غالوم الي راح نقضي فيها اجمل أيام عمرنا من ألعاب و مغامرات شيقة وكمان حفله راس السنه … بنوصل الجزيره وهون المفاجئه، إنّو ما في فندق او غرف احنا قولنا رح نعيش مغامره بطابع بيئي، رح يكون في خيم النا احنا أول ناس بنستعملها، بعد الاستلام في سهره وعشاء اورجانيك عالبحر وتحت النجوم
اليوم التاني فطور، وبعدين بدايه المغامره و ألعاب مائية وصيد. بعد ما نكون انبسطنا وتعبنا بكون إجا وقت الغدا بنتغدا وبنشرب شاي ع البحر، وقبل المغرب بنطلع ع الجمال عشان ناخد جولة عالغروب، بس نخلص جوله الجمال بجمال و سحر و عبق المكان رح تكون عنا فتره استرخاء، رح نعمل يوجا ع رمل البحر، بعدين عشا اورجانيك مع سهره مع البدو ودندنه عالسمسيه، وقبل الساعه 12 بسوي بنركب القوارب لعرض البحر عشان راس السنه غير عن أي سنه مرت علينا، راح نحتفل فيها بنص البحر و راح يكون في ولا احكيلكم خليها مفاجئه احلى.. وكل سنه واحنا كلنا سالمين وبمحبه وسلام.. و 2017 سنه خير ع الجميع

اليوم التالت بنحضر الشروق مع بعض طبعا اختياري، وبعديها بنفطر و بنضب شنتاتنا و بنركب القوارب عشان نستلم غرفنا بالفندق. اقامتنا بالمريديان. بنرتاح شوي مش كتير، عشان نركب البجيز لنطلع ع اللاجونا و الواحات، بنتغدا بالواحة وبنشرب شاي مع البدو، والمسا بنرجع ع سوق دهب بنلف شوي وبنتعشا وبعديها وقت حر

اليوم الرابع بنفطر بالفندق، وبنقضي يومنا بالفندق واسترخاء ع البحر ليجي موعد انطلاقنا، بنسلم الغرف، و بنرجع ع طابا عشان نروح ع الاْردن

تزكروا تجيبوا معكم
– أواعي خفيفه للنهار مناسبة للبحر وشوز (معدل الحرارة في شهر 12.. 25 بالنهار و 15 بالليل)
– أواعي خفيفه ومريحه للنهار مع جاكيت خفيف احتباط للمغامرات والطلعات
– أواعي ثقيله للمسا وللنوم
– ملابس سباحة للطيران تحت المي و بشكير/منشفة
– أدوات شخصية كامله من شامبو وواقي شمس وعطر وفرشاة أسنان وغيره

– آخر موعد للتسجيل هو 2016/12/20
– العدد ٢٠ شخص فقط
– سعر الرحله للشخص الواحد 333 دينار شاملة البرنامج كما ذكر
— الرجاء احضار صورة عن جواز السفر عند التسجيل
— ضرورة يكون دفتر الخدمه ساري المفعول 6 شهور عالاقل مع الشباب عند السفر
— السعر للشخص في خيمه/غرفه مزدوجه
— الرحله للعائلات، المجموعات المختلطه، الصبايا
— فعاليات آوت آند أباوت خالية من الكحول. وتحشيش من غير حشيش
— والأهم دايما جو عيلتنا الحلو بروحكم الحلوه وابتسامتكم
— رح نتصور صور حلوة مع بعض، بتشوفوها ع مواقع التواصل الاجتماعي للمجموعة
– سجل اليوم لتضمن مكان
— التسجيل مع عامر 0799264943

الرحلة مع
Rimal Tours
رمال تورز للسياحة والسفر

معا بمحبة وسلام
فريق البيئة مع فريق الرحلات
Alaa Hamdan Neirat, Safa Al-thaher, Dalia Bushnaq, Amer Hirzallah, Antakino Walid
مجموعة آوت آند أباوت
www.facebook.com/groups/outandaboutjo
0785834000